自從上個學期開始, 我地每個星期六變得不一樣, 因為呀仔開始上補習班.
有時都覺得, 呀仔只係讀緊Pre-school, 唔使咁快補習卦? 但”道聽途說”呢間補習社好”堅”, 入得去既話, 第日入OC class,
Selective School既機會會睇高一線. 雖然消息無從證實, 而呀仔考入呢D精英班亦係好幾年後既事, 再加上學費真係幾貴 ($1000讀半年, 約20課), 但既然佢入唔到心儀個間小學, 咁唯有投資係呢方面(補習)啦….
每逢星期六, 我地都會特別早起身, 因為個班係8:15AM開始. 一向遲起身既我, 每個星期六都滾水淥腳, 要求個仔快D起身, 又鬧佢唔快D刷牙, 之後仲要係車上面食早餐, 我仲要超哂速咁駕車….
由於個補習地點話近唔近, 話遠唔遠, 約15MIN車程, 呀仔補習個2個鐘頭都唔知做乜好, 番屋企覺得唗哂D油費, 其實可以留係度睇書, 但呀女又周圍走周圍搞野…. 好彩有個媽媽介紹, 步行5MIN有個商場, 我就係個度個food
court食早餐, 睇下一周刊, 俾呀女周圍走. 其實呀女都會亂走, 但都俾到我少少寧靜既空間.
呢一日呀仔補習社open
day, 我地可以早少少去俾家長睇下佢地點上堂. 可借我帶住妹妹, 佢地唔俾我入, 怕會影響佢地上課, 咁我就係門口睇下囉.
放學啦! 我地通常會去附近一個水塘餵鴨仔! 我帶哂D過期面飽去, 兩個餵得勁開心! 呢個星期六節目係佢地最開心既事!
餵完之後, 我地又要趕下場 – 網球班. 最近買左支拍俾呀仔, 但其實我都十五十六, 究竟仲俾唔俾佢學呢? 因為就嚟全世界放學校假期, 二月先開學, 但二月又補習又中文班又打算俾佢番游水班同彈琴, 星期一至五番幼稚園, 仲有冇時間玩網球? 我都未諗通….
11:30AM, 乜都學哂, 自由時間! 我會同佢地係學網球個個公園玩, 有時會踏埋單車添! 之後就番屋企, 睇電視, 洗衫, 執屋….. 咁就係一個典型既星期六啦!
