早幾個月開始, 個仔"忽然" 好信有聖誕老人存在, 仲覺得聖誕老人一定會送上佢心儀既禮物.
我本來都猶疑, 應唔應該幫佢願望成真呢? 我曾經同佢講過: "聖誕老人未必會買哂禮物俾每個小朋友, 因為聖誕老人無咁多錢!" 但原來呢D呀仔唔會上心, 總之, 佢信聖誕老人會嚟我地屋企派禮物!
於是, 我地寫左張咭俾聖誕老人, 講左呀仔既願望 - 想要個放大鏡! 對於呀仔既願望, 我有D驚訝, 下, 出手咁低? 兩蚊雞一個咋喎! 我仲一心諗住將係香港買既搖控飛機入埋落去俾多個驚喜. 但老公話: 佢同聖誕老人話要乜咪就放乜囉! 諗落, 都係喎, 所以只放塊放大鏡同一張咭.
至於寫咭俾聖誕老人, 我地一張寄去芬蘭, 一張寄番悉尼 - 係澳洲郵政既服務, 係信封只寫住話俾聖誕老人, 佢地就會回覆番你!
最重要既, 係我買左隻聖誕袜,掛係床頭, 因為一切希望係哂度...
聖誕前, 呀仔日盼夜盼, 話聖誕節唔會訓, 要等聖誕老人嚟. 但由於佢係姑媽屋企過左兩晚夜, 番到嚟, 佢竟然唔記得左, 要我好不經意咁提佢, 佢先記得去check下隻袜!
呀仔去攞隻袜睇, 原本以為無野, 到見到有野, 拆開, 係個放大鏡, 佢個驚喜又開心既表情, 真係.... 做呀媽既仲開心, 幾蚊雞買到呢個童真同回憶, 好抵! (好後悔無攞定個video cam影低! 呢D機會真係唔知幾時再有!)
我問呀仔: "聖誕老人嚟左咩? 我唔知既?" 呀仔話: "佢地爬窗入嚟嘛!" 我話" 我關哂窗亦鎖哂門喎!" 呀仔諗一諗, 話: "聖誕老人有magic, 識得自己開門架!"
我知不久既將來呀仔會知道跟本唔係聖誕老人送禮物, 而係聖誕老媽子買禮物, 但希望佢呢份童真KEEP多幾年, 我樂意買多幾年禮物(不過希望唔係D貴價玩具啦!)
No comments:
Post a Comment