新一個學期開始, 呀仔做個小學一年級學生, 繼續學中文音樂游水SWOP SHOP...
想講講佢學中文.
今年佢中文班升二年級, 番學頭兩三個禮拜, 我真係驚. 見呀仔上堂唔知自己學過D乜, 老師叫佢地抄黑板D字番屋企練習, 佢乜都無抄到, 話唔知老師有講過...
其中一個禮拜, 番學前比佢食lunch, 佢食兩啖話無胃口, 後尾先知原來佢番中文有壓力....
覺得好陰公, 我係咪唔應該比佢學咁多野呢? 我一方面叫老師幫手睇一睇佢, 二方面就開始諗, 係咪要轉班? 落番低D程度? 或者轉下環境學國語??...
諗諗下, 都無乜方案時, 原來呀仔靜俏俏咁改變O左. 佢上番軌道, 自動自覺做哂最基本既野; 仲要,佢竟然自動自覺做功課!!!!!!! 仲要唔使我教我幫!!!!!!
以前"拉牛上樹"式做功課, 迫佢寫5個字我就獎佢粒糖個D, 竟然突然消失!!!!! 
佢今個學期寫既字一D都唔淺, 例如"多做體操身體好", "好同學來遊戲, 快快樂樂在一起", 竟然, 竟然, 一粒字都唔使我再教, 自己寫好哂!!!
(通常佢一個禮拜要寫課文4次, 生字10個每個寫一行, 同埋一D練習紙, 對澳洲仔來講, 係好多架啦!)
我估佢其中一個動力, 係每個禮拜默書, 100分有貼紙, 4次貼紙就有一份小禮物, 佢攞到8次100分, 有兩份小禮物, 佢好開心!
呀仔, 我仲開心呀! 希望你繼續鍾意中文!
********************************************************************
講下學音樂班.
我地係Yamaha呢個班都上O左接近一年半. 呢個音樂老師, 質素麻麻地, 但無辦法, 我地只得呢個時段得.
但最緊要, 係呀仔都OK鍾意音樂.
宜家可以彈到用兩隻手, C major, G major, F major (即係要彈埋上面D黑色鍵), 唔係話好熟, 但對音樂有基本concept. 我都幾滿意啦!
****************************************************************
最後講下, 佢自己間學校.
小學一年級學生, 讀書無乜壓力, 係日日要讀本Home Reader同埋少少功課.上個禮拜家長日, 班主任對呀仔既評語非常之好, 例如佢閱讀同理解英文既程度係全班最高, 寫英文串字亦好好, 數學亦好好, 上課態度好, 有禮貎...
最開心聽到班主任話: Aidan有時會好積極想學多D野, 唔似其他小朋友會被動地學習, 佢學習態度好好, 我對佢一D擔心都無!" 嘩, 做呀媽, 聽呢D說話仲唔開心到飛咩!
不過我成日記得自己初初小學都好叻, 大個就未必係個回事, 我叫自己要繼續小心奕奕, 栽培呢盤小花.
No comments:
Post a Comment