烏龍開學記

澳洲小朋友5歲先正式入學, 讀一年幼稚園, 就上小學year 1, 但係讀同一間學校(即幼稚園課程在小學進行).

叫做終於正式入學, 我心情都緊張, 成日諗要同呀仔預備呢樣個樣.

前一晚, 仲好溫情咁同佢講左一個有關"第二日升學"既床前故仔, 搞到呀仔本來無乜野, 都有D失眠!

 

終於.... 到開學日啦! 我同個仔好早起身, 預備好哂, 準備出門口!

到左學校門口啦! (今日有D涼,又未同呀仔買校服外套, 所以著住自家外套先!)

爹爹同埋未訓醒未換片仲著住睡袋既妹妹都一齊嚟,  同哥哥打氣!

我都奇怪, 點解學校無指示D細仔要去邊度報到? 於是自己走左去校務處問, 先知到.....

原來幼稚園生係遲一個禮拜先開學!!!!!!!!!!!!!!!!!!!!!!!!!!!!!!

我之前見過有張紙, 話叫佢係指定時間做Best Start Assessment, 我以為係番學期間做. 原來個日先係第一日!!!!

我覺得自己好烏龍呀!好彩個仔又無乜唔開心. 算啦, 當係一個rehersal, 俾佢一個實習!

但係, 今個禮拜唔知同佢冇咩節目好, 呢個最頭痕....

再見Pre-school

由兩歲九個月到宜家, 呀仔係呢間pre-school兩年半, 終於, 到左last day 啦....

係上個月班"大仔"舉行左個畢業典禮, 呢個媽媽終於可以第一次見個仔戴四方帽!

 佢地之前有D表演, 呀仔同另一個女仔做好似司儀咁, 帶領同學仔.

又一齊唱歌

姑姑同表姐(係左上角!)都有嚟觀禮! 我話"好小型咋喎!" 佢地都竟然嚟睇! 都好, 可以幫手看下呀妹!

個四方帽, 係小朋友自己用咭紙整架!

每個小朋友都有個獎狀, 呀仔個獎叫"Star Achiever", 我諗即係佢係學校表演都OK幾好!

轉過幾個老師, 我覺得呢個後生女Zinc幾好, 有心機又會同我講呀仔係學校既情況! 佢每個小朋友都送份小禮物!

對呀仔嚟講, 都唔知畢業係乜, 總之有得玩下食下囉!

下個禮拜就"升"幼稚園啦! 媽媽心情好緊張, 又怕你唔願起身, 又怕你係學校學壞.... 但呢個係必經楷段! 希望你乖乖地啦!

中文學校畢業禮

呀仔既中文學校畢業禮係１２月頭舉行左。　佢上年攞左成績獎，　今年預左佢無，　因為番左香港成個月, 無上三堂，　其中一堂仲有測驗添。　但估唔到，　都有驚喜喎！

１。最佳寫作獎攞冠軍　－　我問老師：佢幾時有寫作過？？　老師話：哦，我叫佢寫左Ｄ字，　佢又識寫，　咪有囉！　下？？

(睇唔睇到第一行寫住: 冠軍: 杜泓熹!)

２。成績進步奬　－　聽都無聽過有Ｄ咁既野。同埋頒獎禮亦無提亦無一個儀式頒獎！獎呢Ｄ野，都會開心一陣，　但唔好咁認真！

 

有專人頒獎，要上台攞獎架！

唔知點解, 見到個儍豬仔俾人叫中文名, 跟住上台攞獎, 我覺得好得意! 覺得佢好大個! 個VIDEO我睇左好多次!

仲有每個年級既表演！（支咪阻住哂！）

其實要湊住個女(佢有時走來走去坐唔定)，　又要顧呀仔唔同場數影相同拍ＶＩＤＥＯ，都拿手唔成勢！

睇下張成績單，都ＯＫ丫！最緊要係佢宜家都ＯＫ鍾意中文，又識寫一Ｄ字！如無意外我地會繼續係度讀落去！

究竟呀仔宜家識咩字? 我諗同同齡香港小朋友比, 佢識得好少, 但我覺得都OK啦, 最深識寫"學校",同埋都學過寫自己個名!

聖誕樹

又時光倒流, 講番聖誕節, 想post 低成個月前呢D聖誕樹相做紀念!

係Martin Place, 有好高既聖誕樹!

妹妹飛!

 其實係姑媽約我地去感受CITY既聖誕氣氛, 除左棵樹之外仲有商場既音樂裝飾!

姑媽又買左頂"帽"俾呀仔!

係火車站, 都有呢D燈燈樹!

哥哥又"稱"起妹妹, 因為妹妹無耐性影相, 又想走圍走!

同場加映 - 火車站一D有趣既車軌圖案!

婆婆, 呀女著你個兩件衫都好靚呀!

最後一個Pre-school聖誕會

補番D BLOG債.... 講番12月既事....

以往兩年都係church搞既聖誕會, 今年因為裝修, 所以只有"雞雞地"係番pre-school搞.

呀仔唱歌(後排中間橫條褸蓋哂面個個係佢!)

老師係前面提哂水! 但其實我次次見呀仔表演我都好開心! (不過捉住個走來走去既女就煩D!)

D聖誕餐係岩D鬼佬同小朋友, 我就覺得好難食!

成班表演唱歌...

唔知上小學係點慶祝聖誕呢？一年後有分曉。。。

妹妹的危險動作

記得呀仔細個時都好"活躍", 尤其是約9月個大開始, 成日周圍爬,周圍走.

但感覺上, 妹妹比哥哥"犀利"!

20個月大既妹妹乜都會"擒"一餐. 哥哥係度, 佢係都要跟埋一齊....

 有時哥哥唔想佢阻住哂, 就會用腳踢妹妹 (所以搞到妹妹都有D暴力, 鍾意"還拖"!..... :(

有時係街, 妹妹會逃離車仔, 周圍走.... (坐火車自己走去對面坐!)

最驚就係佢連坐係我駕車, 都會逃離car seat, 無安全帶咁企係度!

永無話乖乖地坐係度, 有親D典禮講座之類, 我要佢靜靜地坐真係好艱難!

有時我會叫哥哥"捉"番個妹番嚟, 咁哥哥就會好用力咁, 20KG抱住個10KG!

 

妹妹D驚險野唔只呢D! 係屋企, 佢會....

明明咁多玩具BOX咁多野玩, 但佢選擇利用個玩具BOX, 擒上枱上面搵唔搞得既野, 例如最LIKE我個銀包, 攞哂D錢同咭出嚟! (睇下佢雙腳!) 我搬開個BOX, 佢就會搬番嚟原位繼續擒! 

有時唔想小朋友掂既野會放高, 放枱面; 但呢個妹妹令屋企無乜地方係特別安全!

睇唔睇到冇咩特別? 佢倒哂D垃圾出嚟, 放自己係個垃圾筒入面!

佢好鍾意搞我張廚房枱, 我地已經用木板隔住. 但最嬲個次, 佢又利用佢個良伴 - 櫈仔, 企高嚟搞野, 結果我預備俾佢既LUNCH就成碗倒落地! 火都嚟埋!

哥哥細個只會係廚房出面塊木板喊到除哂褲; 但妹妹"青出於藍", 可以唔用櫈輔助, 自己擒上塊板, 做呢個異於常人既危險動作!!!

 最近既經典例子 - 呀女自己係雪櫃攞左個朱古力甜筒食, 我見到時佢就係咁既儍樣, 仲想攞第二個! 真係唔知好嬲定好笑!

 有時我都怪自己, 係咪俾得佢太自由, 搞到佢唔怕死?

係咪成日同哥哥玩埋D刺激遊戲, 搞到佢大膽哂?

 講呢個題目好似好有趣, 其實我知亦突顯左我湊女既不足, 好似成日睇佢唔住, 或者令佢危險咁. 有時諗到呢度都覺得自己失敗. 今日同個朋友講, 佢話佢就管得個女太勁, 所以個女遲遲都唔識爬. 佢話咁你個女起碼個人大膽D, 乜都肯試, 係好事嚟既. 唔..... 係囉, 兩睇囉.....

再咁粗魯, 第日嫁唔出啦女!