開心castle jump jump jump

每年12月都有幾位朋友仔生日, 我地都會參加佢地既生日會. 今年我地去Auntie Kay屋企, 同12月壽星仔女慶祝！

 

生日既係Max, Chanelle, Phoebe, Roger, Morgan, 同埋Ethan. 呀仔好鍾意Max n Chanelle個火車蛋糕呀！

Auntie Kay 屋企放咗個大型既Dora jumping castle (彈床),  呀仔其實好鍾意！但遲遲都唔肯入去玩, 又話唔想除鞋又呢樣嗰樣, 個個都好奇怪, 平時呀仔唔係好玩得架咩？連彈床都驚？連平時勁怕醜既Rachael都玩得好開心喎....

擾攘咗幾個鐘, 呀仔終於肯入去. 結果, 一如所料, 玩到唔捨得走！但就嚟天黑, 唔可以玩太耐啦！

聖誕禮物給3好友

聖誔節就到啦！我叫呀仔除咗收禮物之外, 仲要識得送禮物俾人 – 施比受更有福嘛(當然用佢聽得明既語言講呢個道理)！我地預備咗3份禮物同咭俾呀仔pre-school既3個好朋友 – Ethen, Betheny, Georgia！

每張咭都由呀仔「親筆簽名」！除咗祝佢地聖誕快樂之外, 佢地3個出年都升Kindergarten, 所以都希望佢地係新學校會開心。

我諗呀仔都未太知道發生咩事, 我亦都唔敢同佢講話放完假之後3個好朋友都走哂. 嗰日我無意中講起唔見咗幾個月嗰隻公仔Eden仔, 佢已經忍唔住喊. 我知, 佢要學習離別, 但好似有d殘忍.

呀仔出年無得升學, 我成日都覺得好唔抵. 因為呢度教育制度, 係每年7月31前夠4歲, 下年就可以入學. 呀仔8月中出世, 差廿幾日, 咁就要等下年先入學. 呢排聽到唔同既comment話覺得呀仔講野叻, 好醒目, 好有logic等, 令我更加覺得呀仔下年唔入學好浪費！不過都無辦法. 況且呢度d local人都好贊成遲入學, 話全班做最mature嗰個對佢成長更好！唯有咁安慰自己啦！

哥哥上台攞獎

12月係學期既終結, 呀仔亦都完成咗第一年既中文學校課程, 星期日參加咗個畢業典禮.

以為係個課室仔舉行既典禮, 原來係個大hall舉行, 都幾大型喎！

過程成3個鐘頭, 有唔同級別既學生既表演及頒獎. 呀仔好叻叻, 上咗台3次！

第一次：同成班同學仔表演「唱歌」！

 (個衰仔, 人人係度「轉轉轉」, 佢就用手轉就算！佢話怕會暈喎！)

第二次：追頒番上次唱歌比賽攞第三名

 

無厘正經！

第三次：佢攞到個成績優異奬, 全班得2個同學得咋！ 

呀仔好鍾意兩個獎牌, 話哂都有落埋名架！

我問呀仔, 你會唔會覺得好開心呢, 上台攞獎喎！但原來佢對呢d都無乜意識, 只知人地叫佢行邊、做乜, 佢照跟, 同埋嗰日係hall 3個鐘唔知做乜, 好悶！畢竟, 都只係一個4歲既小男孩...

番到屋企之後, 我將上台攞奬一事「匯報」俾老公聽, 佢竟然讚我, 話呀仔有今日係我既功勞！平時想你讚又唔讚, 呢d獎其實好「低能」, 你又會咁自豪！不過都好吖, 呵呵！

爹爹放假放風箏

終於.... 爹爹放假又大風既日子到咗啦！

呢排有2日都係咁「好日」, 玩咗2次風箏！

呢日, 我地去咗屋企隔離個大草地玩, 真係好大風, 爹爹係度, 個風箏真係飛得好高！

飛飛下... 呀仔甩手, 好似呀仔其中一本書個故事咁, 隻風箏飛走咗！呀仔「ware」一聲咁喊, 爹爹唔想佢失望, 係咁追追追.... 跟住爹爹唔見咗, 成20分鐘都未番嚟！我就用粒糖tum番個仔(做呀媽緊係常備呢d物品！), 但呀仔猛問我：「爹爹去咗邊？」我都唔知點答.

最後, 爹爹番咗嚟, 仲帶埋隻風箏添！爹爹追到好遠, 仲要爬上樹先至救番隻風箏咋！

4歲哥哥的語文能力

前幾日呀仔上完中文堂, 我去接放學時陳老師同我傾咗幾句, 佢話覺得呀仔語言能力好好！佢話平時佢問問題都會係女仔主動答, 男仔講野仲係一舊舊, 但呀仔就係成日好快答問題既一個, 而且以佢既年紀識野都算多, 表達能力亦非常好！不過陳老師補充, 以呀仔咁鍾意講野既性格, 如果係hk讀書, 可能會成日俾先生罰！

聽完陳老師講, 我緊係開心啦！我平時都覺得佢表達方面幾好, 但我無乜同齡小朋友比較, 所以都估可能個個差唔多. 不過, 呢排我發覺佢講越來越多英文, 差唔多.... 超過一半都用英文表達！我諗一來佢番得pre-school多; 二來我呢幾個月轉咗schedule, 佢無訓午覺, 我等佢夜晚訓之後先「煲」香港電視, 所以佢睇多咗英文卡通片, 轉哂英文channel！我嘗試鼓勵佢講番多d中文, 但佢竟然話鍾意講英文多d！我都知佢係澳洲出世, 遲早變英文人, 但希望keep住同佢講中文, keep住番中文學校, 有番d中文底.

甜姐兒

 

前日去完健康院做6個月大檢查, 一切正常！宜家妹妹有7.4kg, 67cm高, 頭圍43cm, 全部above average！

最抵鍚係每晚都9點零10點瞓, 有時瞓到5點左右食d奶再瞓, 朝早8點零9點起身！基本上半夜都無乜點嘈！尋晚連5點餐奶都skip埋, 俾我瞓飽！(尋日打針, 半夜嘈咗2次.... 知你可能有少少唔舒服, 唔計數啦！)

 我呢兩日開始餵下糊仔同生果,效果當然唔好,希望慢慢會食多d！另外要開始餵水, 因為佢食慣人奶, 唔識用瓶, 宜家會試下用杯.

呀仔呀女開始多咗「交流」, 有時我做做下野見到佢地兩個一齊玩一齊笑, 我都會好開心！(但哥哥成日都粗魯, 妹妹有時俾哥哥蝦完喊,凄涼！)

妹妹半歲大

咁又過咗六個月！由凍天走到夏天, 由出世時乜都唔識既一個粉團bb, 到宜家都有少少「婷婷玉立」啦！

冬天收埋腳止太耐, 宜家就成日搞!

最叻就係啜手指同流口水!

宜家識坐(都會跌下)同轉身(接近6個月先至識!), 腳仔好大力好似想企咁. 呢個新玩具等佢企住睇野, 好開心架!

以前一pat野咁, 宜家輪廓分明d, 有時笑得幾甜架!

哥哥定妹妹?

表哥的婚禮

移民以來最盛大活動 – 邦表哥結婚, 成個family都嚴陣以待！

早上, 去姑姑屋企, 一對新人向我呢個「舅母」敬茶！

 

早午都未完, 我件衫已經甩線, 要報銷！好彩件衫唔貴, 湊仔婆真係唔好著靚衫！

 

著住靚靚白色紗裙既妹妹係呢個時候poo督大大既…. 雖然同佢抺完, 但仍然好臭, 原來透到去條裙度！但買咗條裙又唔想未影相就除, 唯有繼續著住, 聞唔到聞唔到….

  

跟住大家去咗Little Bay 既 Chapal Church, 一個對住海既教堂觀禮！(影唔到相, 勁背光！)

係咁莊嚴既環境氣氛下, 哥哥妹妹都算合作, 係尾昇時妹妹開始好似想嘈, 我即刻抱走佢, 都無乜事~ (不過同場有幾個細路/ bb, 佢地都唔太靜架啦…)

 

中間空檔時間, 一d都唔得閒！要去化妝、換衫, 結果個仔無訓午覺, 我無食lunch, 係姑姑屋企搵到碗白飯用腐乳餸！

三母子換哂衫, 出席第二場 – 係Lilyfield既一個幾高級既場出席婚宴.

 每位來賓座位都有名牌, 盡顯尊貴！小朋友會有d畫紙顏色筆解悶.

好彩買咗衫啫…. 個個著到去ball咁, 好似出席台慶！個場又好靚, 真係唔好做個失禮既親戚！

仲未warm up好既呀仔, 同埋佢覺得全場「最靚既家姐仔」！

呀仔第一次著老西, 都要「tum」下先肯著. 但小朋友見到d未見過既環境, 顯得唔太自然, 差唔多過咗半場先叫做warm up咗.

老西：全套約aud150, 妹妹2條裙：各約aud25. 我條裙, 連外套：估唔到, 折後aud350!!! 其他人既ball dress都只不過百零蚊, 我條裙其實casual到可以番工去街！不過貪佢可以遮到d肥, 湊仔又唔怕「巢」, 餵奶都ok方便.

 呢餐係食西餐, 頭盤、主菜同甜品, 味道一般; 小朋友有小朋友餐, 呀仔對d肉醬pasta麻麻地, 但對d小吃甜點, 例如mini ice-cream cone就好like！

另外, 都幾欣賞主人家安排既小小「娛樂」, 包括一個candy corner, 來賓可以隨便「畢」d糖果朱古力走, share the sweetness！

另一樣係一個影相機, 好似貼紙相機咁, 來賓可以隨時去影d得意相, 唔使錢！我同呀仔都影咗幾張！

好累既一日活動！對呀仔既意義, 就係知知地咩叫「wedding」, 成日想爹爹媽媽結多次婚, 等佢可以參加！

新blog入伙

決定「打包」yahoo blog的舊文, 找個新單位, 重新紀錄哥哥妹妹的成長點滴, 向新blog出發！