媽媽飲茶小朋友埋堆

我地呢Ｄ師奶仔，有時會約埋一齊飲茶。媽媽講到興起，小朋友就會好悶。。。

呢幾個小朋友就會一齊睇IPAD或者一齊傾計！

呀Kay個仔”肥多”大呀女大半年，　好似係度享齊人福咁！

 

 Edealia　個女細我個女差唔多一年（１２年４月１３日），但佢size同我個女差唔多！

妹妹３歲生日！

2014年5月

時間真係快，妹妹３歲啦！

呢個小妹妹都係一個開心果，都算易湊，食野訓覺都好乖！３歲前少少戒片，比相像中順利，幾日搞掂！

　

面圓圓，個個都話我同佢兩母女似餅印！ 佢又會好sweet, 成日走埋嚟錫我，又會成日講”媽媽我好鍾意你"!

由兩歲時都唔係好講野，到接近三歲時講好多野，好多係幾句句子一齊講，好有羅緝！

 但可能因為同哥哥玩，哥哥有時蝦佢，大家會打交，搞到呢粒女有時都好炆，好粗魯，成日打人搣人! :(

正日生日, 本來諗住3母子靜靜地渡過, 係Hogs Breath食晚飯。點知大表哥大表嫂上嚟探望送禮物, 妹妹好開心呀!

 

大表哥嫂送扮靚袋同埋靚靚項鍊, 仲有佢地幫Polar Bear 表哥同小Ting姐姐帶嚟puzzle禮物!

我係Eastwood買Ｏ左個蛋糕，　多Ｄ人切多Ｄ人食開心Ｄ！！！

　　　

妹妹，　祝你繼續做個Happy妹，　番學叻叻，　同哥哥相親相愛！

Mother's day 2014

2014年５月

呀仔係學校既作品，　送比我母親節！

 

仲有份禮物，　係學校Mother's Day stall買。我之前講明我只要Ｄ好實用既野。結果。。。佢買Ｏ左個手提電話”座”比我。成AUD$4!!! Ｏ個舊膠，邊值咁貴？不過，我仍然珍而重之成日用！

鄰居. 朋友

呢位係Esther, 住係我屋企隔離條街, 呀仔當年讀pre-school, 同佢個大女係同學, 因而認識.

其實大家無乜兩句. 幾年之後, 大家係SWOT Shop碰番, 發覺大家都係度浪費２個鐘等個仔補完習好浪費時間。自此, 以後逢星期二, 我就車佢對仔女, 同我個仔一齊番SWOT Shop, 我就放呀女係佢屋企, 同佢2個細女一齊玩(分別大呀女約半年, 同細呀女約半年!).

其實我要車上車落, 時間油錢都唔化算; 但見佢帶住4個細路(佢O岩O岩同老公離婚), 要係SWOT SHOP等2個鐘都幾麻煩. 而我反正都要車個仔, 車埋佢地都無乜損失既...(我其中一個得益，　就係等呀仔個２個鐘，　無呀女係度我可以好自由咁去shopping 做massage！）

咁Esther都識做，呀女留係佢屋企，　佢就幫我搞掂埋呀女既晚餐，　等我煩少樣野。

而且，呀仔多Ｄ同佢對仔女傾計，有時傾下學校野，有時傾下玩既野，有兩個大過佢既朋友，有時都會刺激下佢學習既興趣。

宜家佢對仔女有時嚟我度玩，我仔女又會係佢度玩，叫做有左鄰右里互相照應，都無話計邊個付出多Ｄ。

呀仔同佢對大仔女friend, 呀女就同佢２個細女年紀相若好Ｏ岩key, 大家真係match!
 

食巴西餐迎世界杯

2014年5月

爹爹宜家多左時間比屋企, 我地出街飲飲食食既機會又高左...

呢期鍾意去食巴西燒烤...

烤肉任食, 仲有特色前菜任食, 我同妹妹都鍾意!

有時就同姑姑同表姐一齊食

呀仔係呢度學識左Brazil呢個字, 知道呢個國家既人鍾意足球.

食呢餐之前世界杯未開始, 學識呢個國家對呀仔係一個通識課!

馬騮爬爬爬

2014年4月

自從呀仔好鍾意玩爬石之後, 我都有留意有無其他活動O岩佢.

呢個地方, 似乎好O岩!

成個場唔係好大, 只比玩一個鐘, 但就有幾個可以爬高既遊戲, 全部都要挷安全帶.完全可以滿足馬騮爬樹既欲望!

妹妹都可以玩!

 

不過哥哥玩多D, 妹妹"蛇gwei", 唔係好敢玩太多.

呢一部份, 呀仔好似空中飛人咁! 其實係要係好高過唔同關, 睇落好似好牙煙, 其實做足安全措施.

 

仲有一個最驚險既環節未玩. 下次可以再嚟!

雖然只限玩一個鐘, 但玩完都幾累! 好, 又有個新"玩"點!

復活節2014

2014年4月

宜家先講番復活節!!!

 今年收到舖頭2個staff送既復活朱古力, 份量好大, 我寧願比人或者丟左去都唔比佢地食! 

仲有係大表嫂比既carrot籃加靚靚朱古力, 呢個會食!

4日假期, 爹爹放一日假, 呢日第一次帶老爺離開老人院, 出街飲茶! 初時都有D擔心, 佢會唔會扭話要番屋企呢? 咁又無喎.

 

妹妹最high!