陰公病病豬

2014年3月

每一次, 正當我暗暗開心, 兩位小朋友好似好耐無乜點病過, 佢地就會嚟一劑!

妹妹發燒, 無哂心機...

哥哥... 一齊病...

已經唔記得O左係咩病, 好彩都係幾日貨仔...

聽朋友講, 食olive oil extract 可以增強抵抗力, 我都買定一瓶, 希望打定個好D既底.

探爺爺

爺爺自從一月跌親, 一直都無再番屋企, 宜家住係係Cabramatta既老人院, 相信佢以後既歲月都會係呢度過.

幾家人輪流探佢, 暫時日日都有人去, 遲D可以會慢慢減少, 始終唔係真係咁近(我屋企駕車起碼35分鐘), 二姑奶更遠.

不過真係要讚下呢度. 由於係新建, 環境好好, 老爺用既瞓既全部都係新野. D職員態度友善, 食既都係我地中國人平時食既, 又有下午茶糖水, 又有中文電視, 每個月仲有唔同活動(如有人嚟唱歌, 室外"野餐", 節日慶祝等等), 等大家比老爺住都比得安心!

我地差唔多每個禮拜五, 爹爹放假日都去. 我會煲定老爺最緊張既老火湯, 帶D生果面飽比佢(其實個度都有提供, 不過老爺想食下其他野)

 

不過老爺都係行唔到. 有時老公扶住佢練習下, 佢成個人斜哂, 雙腳無力. 但聽聞佢有幾次覺得自己行到, 想落床而跌O左落地! 好彩無事咋!

又見彩虹

見到雨後彩虹, 有時仲見到double rainbow, 仔女最開心!

係咪係澳洲見彩虹機會高過係香港呢?

Easter hat parade復活節帽巡遊

2014年4月

成日都好慶幸呢間學校唔使家長同子女係屋企整Easter Hat, 而係佢地係學校搞掂哂.

我, 只係係現場睇下佢出show就得啦! ;)

堂姐21歲生日宴會

2014年3月尾

呀仔呀女既堂家姐Melissa今年21歲生日, 對澳洲人嚟講係大事. 佢媽咪Iris靜靜雞係悉尼歌劇院附近既 Inter Continental Hotel 搞O左個suprise party比佢, 邀請親友出席.

  

 壽星女著靚靚! 佢地包O左間房, Iris, 同埋幾位親友, 都上前講番對呢位女孩既感覺同祝福. 場面很warm.

 

佢地仲安排O左即影即有相機, 呀仔就好開心咁"幫手"同擺post!

 妹妹為家姐仔送上香吻! (呀女條"飲裙"特登買架!)

嘩, 嚟O左澳洲咁多年, 好少去酒店食buffet! (去香港就食得多啦!...) 好期待!

我食O左好多, 好多, 好多, 生蠔同海鮮!

仲有好多, 好多, 好多, macaroon (我係由呢日開始, 愛上呢種食物!!!)

 仲要呢... 核核突突靜雞雞打包幾粒, 同老公分享!(嘻嘻, 番到屋企碎O左!)

  真係食得好滿足既一餐! 呵呵呵!!!

 

小節一則: 係大家未開始食時, 主人家同埋幾位出席者上前講感受. 我唔想對仔女嘈, 就比佢地食D野先. 佢地又有時乒乒嘭嘭有食具聲. 當時我無乜野, 但事後我覺得都幾失禮, 唔識大體. 我都要警覺下, 教仔女一D基本既禮儀.

 

失望的滋味

2014年4月學校假期

澳洲有個兒童節目台, 叫ABC 4 Kids, 全日播好多卡通片, 由一大清早到每晚7點.呀仔呀女係super fans,每個節目都識背咁滯.

我知呢個台有時會去唔同地方做show. 今個復活節, 嚟Parramatta有show! 即刻mark實呢日, 同呀仔第一次現場睇偶像!

我已經好濶佬, 驚難泊車, 費事哂時間搵車位, 諗住泊係Parramatta Park隔離個收費停車場. 嘿, 點知一入去, 簡直就係入O左賊船!

 

 每層係咁塞塞塞, 每個車位都有車, 我以為有好多層, 點知去到最頂, 都無位, 等既車就大把. 個活動已經開始, 但我仲係個停車場度, 進不得退不得! 

塞O左個幾鐘頭!!!! 我想走, 但連出閘都勁塞! 有個女人有D激動, 話咩想報警! 點解? 明知已經full哂, 仲係咁放車入嚟? 你唔係浪費我時間精神係乜?

呀仔由好期望見到Jimmy Giggle, 到好失望好失望, 係度喊.... 我相信佢咁大個仔, 第一次識得"失望"既感覺.... 我幾嬲幾心痛呀!

 終於, 塞到出閘, suppose要比泊車錢, 但我唔比, 按制同個職員講: "你哂我咁多時間, 仲要我比錢你???!!!!" 當然最後唔使比錢.唔知其他人係咪好似我咁呢?

出O左停車場, 條街都塞車. 忽然間, 見到我地舊屋門口(其實跟本Parramatta Park同停車場就係我地舊屋Hunter Street附近) 有個車位!!!! 即刻涉位, 泊!

泊車同活動仲有D距離, 我同呀仔呀女係咁走走走, 希望都睇到D活動. 我所知個活動分2 part, 呀仔O岩睇第1 part, 第2 part應該唔係好O岩. 唔理, 去到先算!

係一個嘉年華會, 見有個地方多人等, 好, 我地又等.

Yeh!!! Jimmy Giggle出場!!!

 

仲有Wot Wot!

 

 好開心咁睇O左一陣.

可惜, 其實呢日約O左親烕去拜山, 我已經過哂鐘(唔忍心見呀仔無得睇嘛!), 所以同呀仔講佢要睇既已經做完, 要O拿O拿聲走...

其實結果.... 我太遲去, 大家差唔多拜完山我先到, 所以無參與到. 趕一輪, 最起碼俾呀仔現場睇到一陣, 我覺得都好值呀!

又space racing

2014年4月14日

自從大約一年前開始, Brian爸爸Samuel約我地去space racing, 呀仔就好期待每一次呢個節目.

呢個活動最吸引呀仔既地方, 就係一班細路自己(其實Samuel會幫)睇地圖, 再係唔同check point度"O都"下張pass, 一個鐘頭內走哂全程.

今次目的地係Olympic Park, 即係第一次去既地方, 一小時順利完成! 每人各得糖果, 同埋紀念品飛碟一隻!

活動完畢, 大家開餐picnic一下.

不過開餐無耐就落雨, 大家即係四散番歸. 連隻飛碟都無攞到! >.<

意外驚喜: 無意中見到Olympic Park有租單車服務, 適合一家大細. 個度環境優美, 不失為第日一個好既家庭活動!

織織復織織

今年婆婆生日, 除O左寫張生日咭之外, 呀仔呀女仲送O左條手帶比婆婆!

宜家好興呢D手帶, 好多小朋友甚至大朋友都一齊整, 呀仔暫時識基本功, 仲有好多花款可以係網上學.

 

為O左呢D手帶, 我都比唔少錢呢! 不過佢出街織手帶, 好過成日問我攞部電話玩遊戲! 

 妹妹都有幫手!

 

  不過搞到成屋企都係橡筋! 個仔又無手尾, 我多好多功夫...