偶遇的彩虹

呢日爹爹放假, 呀仔放學後去左公園玩, 其時已經差唔多天黑, 當我心急想同佢地番屋企怕佢地凍親之際, 竟然見天空有條大彩虹係我地上面!

未親身見過咁大條彩虹! 澳洲見彩虹機會多D, 每次見到都會好開心!

呀仔每次都問: "係rainbow end係咪會有treasure?"我答話, 你咪去搵下囉!

輪流病

 

之前一篇講到哥哥入醫院, 其實一個禮拜前妹妹發過燒, 不過幾日貨仔好快好番.

點知哥哥出院後一個禮拜, 又輪番到妹妹病...

上個禮拜半夜三點幾, 呀女忽然間自己起身落床望住我地, 我老公仲以為個儍妹做咩儍野, 但我一睇佢個樣, 塊面紅哂, 雙手熱哂, 已經知道: 唉, 又病啦...

一如以往, 佢無咩特別病徵, 只係發燒, 同埋開始有D咳, 我就唔理佢, 因為virus一般3日會自動好番 - 經歷過6年湊仔經驗, 已經知醫生會講乜, 所以都唔打算睇醫生. 但係, 呢3日佢D燒好似無乜退落嚟, 藥力過左又燒番, 最高成40.2度(即約104度), 又咳多左, 仲嘔幾次, 到佢燒到第4日, 決定同佢睇醫生.

醫生話佢個肺有痰聲, 應該係肺炎, 開左抗生素佢食. 呀女起初好抗拒, 頭個2次都係強迫佢食. 食左2次真係無乜燒, 但仲有咳, 依醫生指示食1個禮拜.

經過媽媽既包裝, 同呀女講食"ice藥藥" (ice= ice-cream或者一切好味既野), 同埋食完有糖糖, 佢就鍾意食藥啦! (其實我相信雲妮拿味都幾好味!)

宜家呀女無咳啦, 好番哂. 呀仔有D咳, 我帶佢睇第二個醫生, 講開話呀女肺炎,呢個醫生話佢估未必係喎, 因為D肺聲好難分, 應該當時要照肺咁話. 唉, 好多CASE都係, 唔同醫生有唔同講法. 不過呀女宜家好番, 咁就算啦!

撞頭記

係一個風和日麗既上午, 正當我係度掠衫之際, 呀仔學校打電話嚟, 話呀仔係學校同同學撞親頭, 不過似乎無乜事, 係休息室度休息緊, 仲好多野講(!), 只係同我講聲, 唔使擔心.

過左一個鐘左右, 我係Parramatta行緊街, 學校又打電話嚟, 話呀仔宜家好唔舒服, 但D staff 唔敢俾佢瞓(我當時唔明點解), 叫我盡快接佢走. 由於之前學校試過話個仔唔舒服叫我提早接仔, 結果個仔其實無乜事, 所以我諗住都係小事一單, 諗住食完個lunch先去接仔.

再過左半個鐘, 學校又再打嚟, 問我幾時到, 我開始知道應該事態嚴重, 真係要即刻去接佢. 適逢十年唔逢一潤, 我約左老公食lunch, 老公知道之後決定兵分兩路, 佢即刻去學校接仔, 我帶住個女走得慢D, 就番屋企等佢地.

番到屋企, 見到個仔, 成pat野咁, 唔願郁, 一步都唔願行, 成日係度依依鞋鞋話唔舒服, 頭先仲係學校嘔添. 老公覺得等佢係屋企休息下, 但我就覺得又撞頭又嘔事態嚴重, 要入醫院check. 最後我地共識睇一睇family doctor先再決定. 好彩Dr. Jennifer岩岩有個位, 即刻駕車去Eastwood睇醫生.

老公趕住番工, 呀仔完全全身無力又間唔中嘔, 我帶住個女, 究竟點樣可以帶住2個細路去睇醫生? 抱住個仔? 咁個女點? 我決定放個仔係呀女架舊推車仔度, 勉強放得落呢個6歲人, 跟住叫個女同我一齊"推哥哥" - 可以想像下當時都幾論盡!.

Dr. Jennifer見到呢個係咁瞓瞓醒就鞋鞋聲既哥哥, 都唔知佢咩事. 其實我只想佢講一句"你地應該入醫院", 因為始終入醫院好煩, 又等好耐, 如果醫生話值得我地先去. 醫生話: "我都唔知佢咩事.... 但你見佢咁辛苦, 我係你我會去!"

拿拿聲番屋企收拾細軟 - 因為完全估唔到究竟會留係醫院幾耐, 連呀女既晚餐都準備埋放入暖瓶, 仲有我同呀仔既底衫褲等等, 成個背包都裝唔哂, 黃昏時間入Westmead Children Hospital.

呢間醫院, 閒閒地等幾個鐘, 有人等9個鐘, 有人聽講話等24個鐘! 我好好好好彩, 等左未夠3個鐘就入得房! 但等待期間, 呀仔係咁瞓係咁瞓, 間唔中醒話想食D野, 結果食少少面飽飲少少水就係咁嘔, 嘔到成身成車都係, 我當時真係"拿手唔成勢"!



又要睇住個仔, 又要顧住個女, 個女係醫院又周圍走, 又成日搞人地D小朋友(有病菌架嘛!), 又坐地下...唉, 我都無眼睇!哥哥係床度休息, 佢就成日要上床玩, 佢以為自己入左個新既遊樂場!


醫生做左初步檢查(但都做左好耐), 呀仔係半昏瞓或者"依依鞋鞋"中進行. 最後, 由於佢食/飲乜嘔乜, 怕佢缺水, 所以要留院一間, 吊鹽水同觀察. 爹爹放工之後嚟, 接走個女, (佢未試過佢一個人湊女!), 第二朝佢番工前再送番個女嚟醫院比我. 而我就一直留守醫院, 同個仔一齊. 好彩有間單人房, 有D靚靚畫, 兒童醫院係比較照顧小朋友心理.

襯個仔清醒少少, 問佢究竟係學校發生咩事, 係咪兩個男仔玩到癲撞親頭? 原來唔係, 好似話佢同best friend Jakub都坐低, 同一時間想攞一樣野, 咁就撞埋一齊. Jakub 一D事都無. 照計係咁, 個撞力應該唔會好重卦?
 

 入左院吊左一陣鹽水, 呀仔有段時間忽然好好多! 我地就係呢間私家房度影幾張相! 佢記得佢3歲時都入過醫院, 雙手都包住隻"太空船"用嚟吊鹽水!



不過半夜個仔都醒幾次, 第二日情況又慢慢差番, 第二朝早佢話想食塊toast, 整左一塊俾佢食, 點知又嘔番哂出嚟... 到下午, 再開始係咁瞓, D醫護人員成日叫佢: "你唔好瞓啦, 你瞓得太多啦..."
 

又係咁瞓. 醫生決定同佢照腦(CT scan). 其實大家都覺得佢撞親頭應該唔係太大力, 但由於find out唔到點解佢咁drowsy (昏昏欲睡)同勁頭暈, 所以雖然有好強幅射既副作用, 但都要照下個腦. 我老公對照腦呢個安排勁唔like,因為係佢心目中, 呀仔只不過感冒, 眼瞓同頭暈只係心理作用, 無必要要個咁細既細路仔吸咁多幅射. 但醫生堅持, 話已經係幾個專家開會決定既處理方法, 仲話如果我地唔比, 佢地可能會有legal action!

其實個過程好快, 可能1分鐘左右. 最後報告話個腦無事. (我老公覺得好唔抵!)

呀仔仲係咁瞓, 究竟使唔使瞓多晚醫院? 佢仲係食野會嘔, 使唔使再吊鹽水?

到左再入夜, 呀仔瞓少左, 醫生話如果佢飲到一杯水而無嘔就可以出院. 結果都達標, 夜晚爹爹放工時接我地出院.

出院既醫生報告話, 估計呀仔第一個病係腸胃炎 - 所以有嘔同發燒. 第二個病係腦震盪, 估計當時輕微碰撞可能都令佢個腦有少少微絲血管爆左, 所以有頭暈同昏睡. 

個晚,番到屋企, 要同佢地兩個由頭洗到尾, 照顧大家食飯, 一大堆衫洗(仲有D嘔衫同埋嘔車仔!), Benny同大家姐又上嚟探我地, 呢晚好忙好忙...

好彩, 第二日呀仔有明顯好轉, 同我地去街都少左頭暈. 呢個醫院歷險記叫做結束, 其實究竟發生左咩事, 結果都會係一個迷!

呀仔school present 媽媽遇難題

呀仔讀幼稚園功課唔多, 每個學期要做一個presentation. 今次佢地要揀最鍾意既農場動物.

個個同學揀牛, 馬, 羊, 豬個D, 呢個仔專揀D"了能" 既, 佢揀"Kids"!

原來, Kids即係Baby Goats,  即係初生既山羊. 上網搵資料, 所見既唔多. 個仔真係整古, 俾個難題我!

Anyway, 呢個媽媽都盡量搵到D料, 搵左D相.

另一個難題, 究竟點樣令佢參與呢? 

資料佢一定唔識搵. 唯有搵完D資料, 用有趣既方法話佢知, 等佢記得, 然後將預備好既print out叫佢自己剪貼.

咁份功課就完成啦! 係剪得一忽忽, 貼得亦歪嚟歪斜, 但我覺得係佢親手造, 夠真實!

最後一個難題 - 點present?

老師指引, 話叫小朋友盡量消化左要講既野, 唔好對住張紙照讀, 亦可用cue card寫key points協助. 我好努力令個仔記得D重點, 練習幾次. 佢miss左points都唔緊要. 個仔都有呻, 點解唔可以寫低哂俾佢照讀? 我話驚D同學仔聽完會boring.

點知, 跟據呀仔所講(因為課堂期間, 我都無得去睇!) 到頭來全部同學都照讀, 而呀仔就唔係, 而且有miss points. 我覺得佢應該會被讚, 因為佢有消化內容! 但點知都無被欣賞! 車, 原來老師講一套做一套咋...

Anyway, 都係一個好練習! 不過今時今日D父母, 除左打工做家務, 仲要花時間"做功課"呢!

學校開放日

我都唔明點解D人可以番全職工又可以湊仔, 我覺得做媽媽真係花好多心機同時間.

呢日係呀仔學校開放日, 有個Book Character Parade,要每個小朋友都扮一個故事書既人物. 我真係諗爆頭都唔知同個仔扮乜好.我以前讀書邊有搞呢D野架??!!

Shopping時搵埋哂D小動物衫呀, 面具呀帽呀.... 硬係覺得唔多對. 本來想買個Transformer超人面具, 但呀仔堅持自己無Transformer書所以拒絕(因為要"Book Character"嘛!).

終於, 攞哂呀仔書櫃D書出嚟, 終於靈機一觸, 搞左呢個造型 - Bob The Builder!!!

係呀仔玩具堆中搵到呢頂Bob the builder帽, 其實係一件幾年都無攞過出嚟既玩具. 著件格仔衫, 牛仔褲, 再搵到一堆"架生"如玩具鎚仔斧頭等, 成個builder造型, 唔使花錢只用現成野, 過關!

不過相比起其他同學仔, 其實呀仔呢個造型簡單D, 唔突出, 因為佢地D父母真係好有心機.不過我見有D人著番校服, 可能佢地父母唔記得左, 我覺得佢地有D慘, 會自卑.

 

連校長, 老師都扮埋一份! 圖中坐低著靚靚裙係呀仔班主任!

呢個好似係副校長

 

校長(最前者)同大家揮手!

不過呀仔勁鍾意自己呢個造型, 番到屋企都唔捨得除衫, 仲係度同個妹繼續連戲!

 

仲擺唔同post要我影相!

 

除左個遊行之外, 我地仲參觀呀仔班房, 見到呀仔既作品.

係鏡中自己既倒影喎.

自畫像 - 我覺得勁搞笑, 呀仔自畫都知自己兩條眉毛係連埋一齊!!!

加數變彩虹

 仲有其他....

呢度呀仔寫自己上個禮拜入左醫院, 仲畫左張圖話自己照腦.

open school其間, 妹妹都有得玩架!

  估唔到個open school咁耐, 妹妹又夠鐘食飯, 所以我未等節目完就走.

 其實呢間學校各方面都唔錯, 真係唔明點解排名咁低呢?...

daddy's birthday

睇, 爹爹七月頭既生日宜家先刊出!

生日正日, 爹爹當然要番工, 我地拎蛋糕上舖頭等佢收工.

呀仔整左張"狗仔咭"送俾爹爹! 

不過爹爹無咁快就等, 呀仔呀女又夠哂鐘訓, 結果我地拎番個蛋糕番屋企

第二日係屋企再慶祝過!

切完蛋糕, 仲有呀仔最鍾意既... 同爹爹祝棋!

大人生日, 唔知大人定細路開心D呢呵?