媽媽們的聚會

移民嚟澳洲, 好慶幸識到呢班媽媽朋友. 大家仔女年紀相若, 又一樣有香港背景, 眨下眼已經識左5年啦!

最近, 大家嚟個新突破: 我地每個月會搵一晚"賣甩"個老公同D細路, 成班女人去食野傾計!

我地去左Castle Hills既 RSL club. 我特登搞妥哂仔女既各樣野, 老公番嚟叫佢睇住, 跟住自己楂車去. 都幾exciting架, 因為生仔女之後都無乜得話自己出街, 仲要係出夜街, 去食飯飲野! 我覺得既興奮, 又難得!

. 媽媽們有講唔完既話題, 仔女呀, 自己呀.... 7:30PM開始既約會(我8點幾先到),傾到.... 零辰2點都未散! 我就睡魔急call, 怕無精神架車番屋企, 所以走先. 佢地仲繼續傾!

番到屋企, D燈熄哂, feel到老公唔like我去到咁夜. 果然真係面黑. 但呢一個月一次既聚會真係對湊仔婆嚟講好refreshing! 唔理咁多, 下個月再嚟!

繼續游水

以前同開呀仔學游水,跟住停左大半年, 宜家學番.

等到臨冬天先嚟學番, 我都覺得自己儍. 不過暖水池, 唔怕啦!

呀女成日都想"中"埋落水度, 好彩呢個泳池樓上就係我做GYM個度, 我係MEMBER, 可以有免費child minding (即係幫我睇住個女), 咁我就可以專心買杯咖啡, 睇呀仔游水啦!

呀仔游完水, 我仲可以放低埋個仔, 去做場GYM添! 做呀媽, 其中一個技巧就係要"有效管理時間及資源"! 係呢件事上, 我係做得唔錯架!

婆婆生日快樂!!!

婆婆祝你生日快樂! 祝你今年周圍去玩, 周圍去食, 過自己舒服開心既生活!

今年呀仔係中文學校學識左寫"婆婆", 又學識"婆婆"即係"外祖母", 所以即席揮毫寫俾婆婆!

以下係製作特輯:

雖然學過, 但寫"婆婆"都要媽媽提一下... (妹妹見哥哥寫, 佢又爭住寫!)

呀仔學"外祖母"都用左好耐時間, 講極都唔明幾時有個外字, 幾時用"母"幾時用"父", 搞到我好勞氣! 好彩宜家都識左!

都寫得唔錯丫!

原來"婆婆"仲有一個稱呼係呀仔識寫既, 係"媽媽的媽媽"!

寫完之後整古做怪!

最後寫埋"Happy Birthday", 因為番書仔唔識寫"生日快樂"呀!

本來諗住叫個仔畫幅畫寄俾婆婆, 點知用左好多日, 呀仔日日畫完都話自己畫得唔靚,跟住發脾氣唔畫. 婆婆呀, 你知唔知要呢兩個人仔做少少野都唔EASY架, 叫佢畫個畫或者寫幾個字, 花既心機同用既氣力, 絕對俾影張全家幅大好多! 希望你笑納呢份心意!

媽媽的新玩具

係Facebook見朋友用”光波爐”整好多野食, 而且煮脆口野都唔使點落油, 又唔會周圍彈油煙, 好似好吸引咁. 岩岩呢邊有間超級市場有個光波爐(呢度叫"convectional oven”)減價, 只係AUD25 (即係港幣200蚊度), 原本諗住買, 點知老公放工時已奉上一部 – 都有少少心有靈犀喎!

新屎坑, 即刻整左入門篇 - 雞亦. 

 第一次見到D皮下脂肪係咁溶係咁滾, 係咁滴落個爐度, 真係好正呀! 我懶, 無醃到D雞亦, 因為平時煎我都唔醃, 只係塗D蜜糖係出面. 效果都OK喎, 只係無想像中咁脆口. 下次會試下醃唔同口味.

********************************************************************************

過幾日身痕, 整燒肉.

 

我見食譜講到好容易, 舊五花腩只用鹽醃, 但原來我忽略左一個重點: 要買個"豬皮插"嚟插豬皮, D皮先會脆! 我叫老公係舖頭攞左幾支尖既針, 係咁插.... 不過效果麻麻, D皮唔係度度脆, D肉又唔咸. 我覺得唔太差, 但我老公一件都食唔哂! :(

**********************************************************************************

 呢日想食豬扒, 不如整吉列豬扒啦! 用呢個爐唔使炸, 健康D! 

其實都要落D油, 係塗係塊豬扒出面, 但比起炸, 緊係少好多.

 又係, 我都覺得OK幾好味丫, 但老公就話乾得滯. 其實係我掛住諗塊豬扒, 無諗用咩汁serve. 下次要諗得全面D!

下次想整下D曲奇呀, 蛋糕呀咁, 應該覆雜好多, 可以作為學校假期既在家親子活動!

復活假期活動 - Liquid Cinema

(呢篇係舊文, 延續復活節既野, 其實復活節都過左幾個禮拜啦!)

呀仔有差唔多一個禮拜復活節假期, 我想諗D節目俾佢. 本來我有幾張睇足球既贈券, 諗住同個仔貪得意睇下, 做下澳洲人! 最終都係比較遠, 無去到.

兩手準備,結果去左另一個節目 -  去左"水上影院"!

呢個叫做Liquid Cinema, 螢幕係Parramatta河邊, 觀眾就係河另一邊睇, 係3-4月比較好天時舉行. 呢期就播復活節電影.

我地一家三口,同其他人一樣, 坐係地睇.

做呀媽緊係要帶定D野食去,當係一個picnic! 呀仔就食佢呢個復活節第一粒(亦係唯一一粒)朱古力復活蛋!

有時你以為為仔女預備好節目, 但未必岩佢地心水, 亦未必領情. 當然我自己對呢D卡通片無乜興趣,但我無幾耐之後發現, 原來呀仔一路望住隔離個個垃圾筒, 無望住個螢幕! 佢跟本無興趣! 唉, 我都無謂係度餵蚊, 睇左無幾耐就拉隊走人...

好彩呢個節目近近地, 唔睇就算. 不過下個禮拜呀仔開始2星期school holiday, 我又頭痛唔知安排佢咩節目好LU...

Easter hat parade

係澳洲, 復活節都算係大節日. 由Pre-school開始, 呀仔都要整頂Easter Hat係學校做Parade (即係好似catwalk咁, 要展示俾人睇). 

 

上年我同佢夾手夾腳整左頂; 今年, 原來係學校成班同學一齊整, 唔使煩我, 好野!

 我初初以為要係屋企整時, 都幾苦惱, 因為同個朋友傾, 知道佢早一個禮拜就幫個仔準備, 又幫佢整, 我知有D人好花心思, 整到頂帽好有特色. 我上年求其搵咭紙整, 求其貼D蛋, 今年都特登上網, 睇下D人點認真做頂帽. 所以當我知道我唔使幫佢整時, 真係好開心! 

 

Parade當日, 佢地歡迎家長去欣賞. 我泊車時已覺得唔對路, 話, 仲迫過平時接番學放學既? 原來D家長真係會好有心去睇, 勁多父母同祖父母! 我心諗, 如果係香港, 個個父母都要番工, 邊會請假睇個仔出場個幾分鐘丫!

 (不過唔知點解D澳洲人好似成日都得閒咁, 我成日見D呀爸接細路放學或者陪佢地去學野, 點解D男人唔使番工既??!!)

係呀, 呀仔同成班同學出左幾分鐘catwalk咋(上圖黃衣者), 因為全校學生都有出show. 但我呢個做呀媽既都樂在其中, 做呀仔既一個小fans, 唔錯過佢任何出場機會!

Easter Show 2013

已經好多年無去Easter Show啦! 上一次去時呀仔仲要推仔車同換片, 我諗都有三年前啦?

好耐都無一家四口出動, 今次拍埋我老公好朋友一家一齊出動啦!

 呀仔搞人地刨冰D七彩糖漿!

一齊睇一個女子跑馬仔show

呀女大個左, 多左整古造怪表情!

$15一支電動吹bubble連2支bubble, 呀仔係人地個檔度玩都玩飽啦,  咁貴唔買!

 

另一個show係呢度必睇既 - 砍樹比賽!

 真佩服D人又大力又唔怕砍斷腳! 

同呢個俊uncle一家去, 佢地個女大, 所以有時都會幫手睇下我兩個細既...

又買野食俾呀仔, 呀仔見到pop corn兩眼發光!

Easter Show另一重頭: show bag!!! 好多澳洲人嚟Easter Show都係為左買好多show bags! 通常每個有唔同主題, 主要係卡通人物, 入面有個個人物既用品或者零食.

我原本想同呀仔慢慢揀一個佢鍾意既bag, 點知auntie一早買左個俾佢... (但其實我唔係好岩心水, 一來唔係咩卡通人物, 二來入面差唔多全部都係糖! 但我見佢有一個, 我就無再買啦!)


每個袋大約$25, 我地另外買左D糖既袋for舖頭用, 一般都比出面平D.

呀仔本來想扮好開心張大個口, 點知影到呢張相, 好似想咬人pat pat咁! 我同佢望住張相係咁笑!

本來有諗過買家庭飛, 包埋D乜乜入場物物遊戲, 好彩無買, 因為根本都無乜玩到D俾錢野. 我地勉為其難咁俾錢玩左呢個摩天輪. 

 估唔到, 都幾快, 我全程都好驚, 絕大部份時間都無張開眼, 捉住老公雙手! 呀仔呀女都無驚, 我都唔知點解咁怕!

 

太少一家四口既節目啦! 我見到呢D老公同仔女一齊既畫面, 甚至背影, 都忍唔住要留住一刻!

街頭有人表演魔術, 呀女拖住哥哥, 兩兄妹好專心咁睇!

睇, 兩兄妹眼神幾一致!

其實同呢兩兄妹行Easter Show, 都幾挑戰架! 雖然我地推住架車仔, 但今時今日既妹妹又點會肯全程坐車?  大多數時間都係拖住, 甚至抱住行!

 

仲有成日騎膀馬! 爹爹自創"單邊"騎!

 個仔呢, 都有叫累(無係香港時咁過份!), 行去停車場遠時, 佢成日周街坐地休息!

至於食呢... 我呢個媽媽出門前煮一大煲通心粉, 點都"質"佢地食D, 又帶D出去俾妹妹做lunch, 都食得幾合作! 但沿路都再有食野(大人都肚餓啦!), 有subway, 熱狗, 粟米, ribs, 咖啡....

 妹妹成日無瞓午覺, 全日high 爆!

爹爹成日話"拉"女"拉"心肝, 同個女相處時間, 特別珍惜!

聽老公講, Easter Show原意係俾D澳洲本地農夫無年一度去show自己既收成品, 例如農作物, 動物(好似羊呀馬呀咁), 慢慢演變成一年一度一家大細去玩既節目, 先會多左機動遊戲個D. 我地今次因為兩家人去, 大家之前無乜夾過, 帶住小朋友又唔太方便, 結果幾個想去既地方都無去(包括剪羊毛同埋睇動物等), 有D可惜. 

但一家四口去玩, 我其實已經覺得係一個好好既回憶!