中午Rita過嚟同我食LUNCH, 夜晚Jessica, Lucas 同 Irene 就同我去Pancakes on the Rocks, 之後老公都有嚟到, 以Pancake代蛋糕, 同仔女吹左蠟蠋.
呢日最有意義既, 係呢日同時係呀仔學校既"家長日", 每位家長會同班主任單對單傾下小朋友既情況.
我之前都無乜IDEA問乜好, 只諗住問下班主任呢間學校D畢業生成績呀, 入唔入到Selected school呀咁. 點知, 有驚喜喎!
班主任講左幾樣野, 大致上係話呀仔宜家識既野(主要係學英文同數學), 都超越左個 syllabus. 例如英文, 佢地宜家幼稚園已經唔係學A-Z, 而係學phonics, 學緊例如 "ai", "ph"點發音, 再學相關既字 - 叫做 "Jolley Phonics". 老師話俾佢一D字, 佢可以憑個讀音而read到呢個係咩字, 呢樣野我好驚訝, 因為我無乜教過佢認英文字, 但原來佢已經識得一D (佢仲成日話自己"I'm very good at reading!")
例如數學, 佢已經識得一D深D既加數, 有時佢識一D野, 老師忍唔住同佢講: "呢度唔係得我同你, 要就番其他同學既進度, 唔好講住"!
佢話宜家呀仔會同幾個一樣學得比較快既同學一group, 我知當中有呀仔係學校既好朋友Jacob, 岩岩過左6歲生日 - 即係大佢半年.
其他品行方面都幾好, 係有時唔太專心, 掛住同人傾計. 咁呢D都明啦, 小朋友係咁我會接受!
做呀媽, 聽呢D緊開心! 但冷靜落嚟, 我會叫自己唔好開心得太早. 由於呀仔呢間學校多本地鬼仔, 佢地對成績無咁緊張; 如果係一間多中國人既學校, 佢就未必係標青. 況且呀仔間學校排第四百幾位, 我D朋友仔女入哂50名甚至頭10名既學校, 可能佢地更勁. 但係, 成個省應該係跟同一個教學程度, 所以點都係OVER左佢應有既程度丫...
不過最開心既, 係班主任話佢對學習好有興趣, 就算佢已經識既野, 佢依然好投入, 又會應用係日常生活! 我諗小朋友宜家學幾多唔緊要, 最緊要係鍾意學習, 希望佢會維持落去!
點都好, 都開心既! 而且, 我覺得自己都有功勞架! 佢鍾意英文併音, 係因為佢細過我已經成日教佢引導佢去諗(因為我Form 6學完都好有興趣!), 所以宜家學呢D都唔太陌生. 而且, 我覺得我成日帶佢去唔同地方, 包括番香港, 佢既視野會比其他同學濶, 對多D野有興趣!
呀仔, 我成日覺得比唔到你讀排名高既學校對你唔住, 希望以你既天資, 加上我既努力, 我地係第四百幾位學校讀書, 都可以讀得標青, 同埋入到selected school! <-- 生日願望!
