妹妹九個月大

九個月大啦！印象中哥哥九個月時好似識好多野, 但妹妹就無咁多, 可能第一個會認真教d, 第二個就... 多d由佢自己玩多d, 忙嘛！

扒：自從呀女識得周圍扒之後, 大家既生活好似唔同哂, 成日要捉佢呢樣stop佢嗰樣！宜家唔係躝啦, 真係扒啦！但間唔中見佢「呢度損, 嗰度瘀」, 都幾搞笑！

流口水：流多咗好多, 但唔肯用肩肩！乜都放落口, 我諗佢已經吞咗唔少紙落肚！:p

企：呀女周圍「搵定企」, 總之一有啱高度既, 唔理係乜都扶住企一餐！最常用既係尿片盒, 高度最合適！

 

食：食糊仔、飯仔都ok. 但最近去健康院check過, 佢宜家8kg, 係under-weight！高度亦係under, 我聽完之後勁唔開心！可能因為佢遲食solid, 宜家叫做食得ok, 但我都未俾好足既份量. nurse叫我每2-3 hr一個cycle, 要餵奶、solid正餐, 同埋小食. 嘩, 又要整又要餵, 好忙架原來！但為咗佢既體重, 我真係要勤力d！

除咗用d瓜瓜肉肉煮飯仔之外, 我最鍾意煲大煲湯, 例如雜菜、蕃茄薯仔排骨湯等, 再用湯煮飯仔, 大家都有得食！

訓：唉...

佢不嬲都唔識得自己訓, 日頭我就由佢係床度大喊, 多數喊5-10min就會自己訓, 但訓時好似打大扙咁, 想像度佢係床度有幾大扭計！

佢宜家識坐, 識企, 令「自己訓覺」更加難！因為坐住企住更加訓唔到！呢排成日出現呢個畫面：

 坐住扭計扭到訓著！但當我幫佢平訓番時, 佢又喊過！

半夜每2-3hrs又醒要食奶, 簡直大退步！其實係我衰, 有一排俾佢食想佢收聲, 之後就戒唔到！我問過唔同既人, 呢個情況要搵d專業人士協助.

 

婆婆叫我教佢拜拜呀, 點虫虫呀咁, 真係無乜時間呀！

呀仔的情緒問題2

爺爺生日, 我叫呀仔畫咗張畫送俾爺爺做禮物. 呀仔畫咗佢同爺爺拖住手係火車站行, 同埋佢啱啱學寫既中國數目字 - 爺爺「八十八」歲生日.

但係呢張畫既背後, 其實呀仔發咗好多次脾氣. 例如birthday個字寫過咗落幅畫、棵樹畫得唔靚等等, 當佢一唔滿意, 佢就發好大脾氣, 掉筆、大力「卒」d顏色等, 仲會大喊. 我成日同佢講「doesn't matter」, 你點畫爺爺都會鍾意等, 佢都唔聽, 結果連我都火滾, 大鬧佢一餐, 結果2個人冷戰！

到爺爺餐晚飯, 我之前叫定佢『要有禮貌, 一陣見到人人要叫人」, 點知佢入到去話好驚, 唔想叫人, 甚至唔想見人. 結果佢死都唔肯入個酒樓book咗嗰間房, 我鬧佢話我自己入去食飯, 唔會陪佢, 叫佢係出面等, 結果佢真係唔怕, 一直留係出面！個個親戚輪流出去同佢傾計, 但佢勁硬頸, 唔肯入. 搞咗半個鐘, 終於肯入, 但都唔叫人. 之後我俾佢做功課, 佢寫錯咗個字, 我叫佢cross咗個字, 因為我無帶擦膠, 結果佢又大吵一番. (sorry, 唔應該咁睇, 但我真係覺得.... 勁失禮！)

仲有, 嗰日同佢做功課練寫字, 佢成日寫唔到個「6」字, 又唔留心聽我講, 結果寫錯又係發脾氣, 大喊, 掉筆！

佢其他處境都好乖, 例如我叫佢做既野, 佢好多時都即時應承, 即時遵守; 但呢排幾單大脾氣事件, 我即時都唔知點處理：用軟功定硬功好？2次我都係講幾句無用我就用硬功, 點知都fail. 可能學酒樓個呀姐話齋：「你個仔好硬頸, 千祈唔好同佢硬碰, 佢硬過你！其實佢係明事理,你同佢多d傾下, 佢會聽你講！」

俾個路人甲點一點, 覺得又係喎, 既然呢排佢有情緒問題, 就要分開識真處理, 唔係一味大聲鬧. 不過我feel到呢排呀仔d不安全感多咗, 我要俾番多d信心佢.

呀仔的情緒問題1

上個禮拜呀仔番學, 無啦啦喊住話唔捨得我走係度大喊. 我以為係一日半日個別例子, 點知佢連續成個禮拜都係咁, 番到屋企都喊住話唔番學, 又話同Rex & Annalese 唔係好朋友. 連帶係中文學校門口都話唔願番學. 

我同老師傾, 大家估計係因為佢既「前best friend」Ethan走咗之後, 佢想同Rex好似同Ethan一樣咁friend, 但Rex可能有其他圈子, 唔似得同Ethan一齊時咁糖痴豆, 當Rex同其他人玩時, 呀仔唔識得同其他人玩, 於時覺得孤獨, 就唔鍾意番學, 就掛住我.

見到佢喊, 我都有d心痛, 但呢個過程佢一定要學習, 希望快d過渡.

哥哥學打網球

哥哥係表哥既電視遊戲機度玩tennis玩得好開心, 加埋睇電視網球賽覺得好好睇, 所以當我問佢想學咩運動時, 佢自己揀咗學tennis！

 呢排一直落雨, 所以遲遲先上第一堂.雖然只係半個鐘, 但呀仔好開心！

教練Michael教簡單既姿勢, 但我已經覺得幾pro！

每堂$16.5, 希望呀仔唔好成日留係屋企睇電視, 正正經經學d運動.

其實嗰堂第呀仔同另一個女仔, 不過應該堂堂d學生唔一樣. 教練話佢有好多4歲既學生, 呀仔算係打得唔錯喎. 唔知係咪因為我呢排同呀仔係屋企打羽毛球, 「訓練有素」呢？

妹妹躝躝躝

估唔到躝躝下, 妹妹話咁快由廚房去到廳, 再去睡房！

有時睇少眼, 佢又唔知執d咩入口呀！

妹妹離奇落床事件

其實呢件事已經發生咗成個月... 係呀女大約7個月大時, 有一日佢係度喊, 我諗住佢可能眼訓, 於是好似平時咁放佢落床, 由佢喊喊下訓.

但佢喊喊下, 咦, 點解d喊聲近咗既？我入房, 見到 - 

佢係房地下度！明明佢係床架, 點解會落咗地？但我見到佢張床隔離個垃圾筒跌咗, 可能佢唔知點樣爬跌咗落固垃圾筒度, 再落到地？

呀女點落地, 依然係個迷！但原來張床仔都唔係太安全啦！(不過之前無拉高個閘, 宜家拉高番啦！不過我成日要烏低身抱佢,腰骨都差哂！)

妹妹的新髮型

妹妹之前d前額頭髮太長, 督住隻眼, 我忍唔住同佢剪短咗 - 但真係就咁打橫剪短！呢個look得唔得呢？(仲要加埋下面兩隻牙仔！)

我老公就話好醜樣, 叫我即刻帶呀女去舖頭剪番好個髮！我無啋佢, 我覺得都幾可愛吖！以前就靚女d, 宜家...另一個look啫！

 
唔怕唔怕, 小朋友d頭髮好快長番, 好快無呢個儍樣架啦！

士多卑利果園一日遊

表姐係Audi車廠番工, 員工「福利」之一就係可以係weekend架唔同靚車試車, 之後寫番report俾公司(但唔當work hour喎！). 試車一定要係遠行, 尋日表姐就同兩個表弟妹(同埋佢地呀媽 – 即係我！)離開Sydney, 去咗Orange摘生果！

 

 

我地屋企同Orange既距離成3個鐘頭車. 由於果園3pm關門, 我地已經唔敢中途停車休息食野, 一直出發. 兩個細路當然無咁好耐性坐成3個鐘, 好彩妹妹都ok, 係後期夠鐘食奶所以猛喊; 哥哥呢, 不嬲坐唔到耐車, 我唯有帶定成個百寶袋, 又零食又聽歌, 好彩都順利到達.

 

到達時已經兩點幾！其實上次表姐帶過呀仔嚟呢度摘士多卑利啦, 我就係第一次, 我係超級excited！當時都幾哂幾熱, 我仲要抱住妹妹, 但我都係咁揀d大粒既紅既, 都幾甜！

把握時間, 除咗士多卑利, 就係raspberry收成都ok, 我地都摘咗一d. 不過呀仔好似無乜mood咁, 都唔係郁手摘好多.

 

同表姐一人各一盒, 盛惠三十零蚊！

雖然, 其實有大量家務未做, 呀仔未做功課, 但呢幾年真係好少「遠行」, 所以雖然來回6個鐘, 番到屋企又散哂, 但依然好開心！

同呀仔當然係一個好既親子活動, 同埋教佢幾樣野：士多卑利同respberry都係係矮樹生長, 唔係大樹上, 唔係泥土內. 同埋respberry d 樹枝好「吉」, 仲有, berries既生長時間係每年11月至5月！

希望下次有機會嚟, 探下blueberry, blackberry, ….. 啦！