妹妹8.5月大

妹妹係呢個月好似有好多轉變咁, 有好既, 有唔好既.

好既轉變：郁動多咗好多呀！由自識反身, 到宜家「扒來扒去」 - 唔係爬！但都已經到去屋企唔同既地方, 放唔同既野入口！有時見佢「扢」起個pat pat, 想開始爬但又未係好得, 但就可以「扒扒下」個pat pat放番係地下 - 坐係度！有時成日想扶住d野企起身添！總之呢, 好mobile啦！

仲有係食野, 都順利咗. 我宜家煲d粥仔佢都食. 我通常切碎d 番薯或者紅蘿蔔或者南瓜, 放塊肉片煲d飯仔; 有時唔落米, 就由得d「湯」用嚟撈落d糊仔度 - 因為之前買落幾包, 想用埋佢. 我諗糊仔即係磿咗既米, 效果應該差唔多！仲有呢, 呀女鍾意食面包, 哥哥食親佢就想搶！有次我食車厘子, 成碗放咗係地, 呀女爬嚟一手搶咗, 「鍊」到成手汁！激死！

唔好既轉變呢.... 半夜成日醒！以前佢可以一覺訓到8-9個鐘唔嘈我, 但已經無呢支歌仔唱！半夜成日醒2-3次(甚至更多), 我唔想佢嘈俾佢食奶, 但其實只會令情況更差. 有幾次醒咗唔肯訓番, 又要扭計, 我又累又炆. 總之宜家一放佢落床, 佢就喪喊, 扭到翻天覆地, 好彩既話就15min內訓, 唔好彩既, 我試過佢嘈成個鐘都唔肯訓, 我就死死地氣俾佢食住訓 - 我輸哂, 跟住我就會好唔開心. 同d nurse 傾過, 宜家盡戒「食住訓」(但半夜我真係好累, 想用最快既方法令佢訓), 希望情況會改善.

呢個歲數, 好似應該可以叫下媽媽？點下虫虫？我都無話成日教佢, 慢慢嚟啦...

入利是派利是

今年第一年搵呀仔幫手入利是, 其實佢都唔係覺得好好玩(點解我細個時咁鍾意做呢樣野？)不過都俾佢參與下！(我今年用上年中買既「馬仔」利是封！)

 舊年派利是, 封封$20, 但原來佢地唔太care個「內容」, 人人係咁意$5 or $10, 我地今年都封$10. 同埋上年d媽媽成班團拜, 派到亂哂, 唔知邊封打邊封, 遍遍我又唔係太細封, 蝕哂. 好彩今年大家都唔提團拜, 少d麻煩！

親子教育 - 同呀仔入咗幾封朱古力利是, 番preschool派俾friend既同學仔同老師. 

 

其實local鬼都知Chinese New Year, 但當然佢地知完就算, 唔會celebrate. 其實咁做係俾呀仔feel多d個節日. 不過有d 父母都appreciate, 有個爸爸都開心呢個舉動俾個仔知cny, 佢又問我多少少資料, 例如今年係咩年呀咁.

嘻嘻, 其實d朱古力係唔知邊個送嚟既聖誕禮物, 我就物盡其用, 好過俾我同呀仔食咗d朱古力啦！

龍年恭喜發財！

我都幾鍾意過農曆年, 因為節日氣氛最濃厚. 可能尤其是有咗小朋友, 每個節日都特別有意義, 想佢地感受節日氣氛, 學下同節日有關既野, 大個咗有好既回憶, 又等佢同家人聚下會, 問候下！

當然呢度同hk既氣氛差得遠, 無得行花市, 又無話互相拜年, 但好彩大家都乘機聚會一下, 派下利是, 都好過無吖！

今年大家選擇係年三十晚, 係老爺屋企大食會, 每人帶d食物. 呀嫂買咗好多海鮮、和牛; 姑奶就炆冬姑, 煮齋; 有d姨甥仔女買燒腊、整沙律. 我就包咗d腐皮卷, 都幾麻煩架, 好彩前一日包好哂, 當日就係老爺屋企煎, 味道.... 一般啦！

 

個個都同呀仔同呀女玩, 佢地兩個多人錫, 我當然開心！

今日著條靚裙仔, 係表姐買架！

娘娘今日煮好多野食, 買咗成aud$500幾蚊！仲要執屋呢...辛苦哂！

 

姑媽作狀俾蟹我食！

爺爺唔知點解成日話要抱妹妹, 我又怕佢唔夠力...

哥哥呢.... 表哥扮恐龍同佢玩, 可能拉得佢太大力, 最後大喊收場！

呢日大家亦有派利是 - 年三十派利是都係第一次！因為始終呢日人齊嘛... 今年仲係呢個表哥第一年派利是添！

新年正日, 反而無乜特別, 我朝早同老爺係間新酒樓飲茶, 盛惠aud30 (都唔係食咗好多野咋, 仲幾悶添....)

下午我送俾自己一份「禮物」：去咗message, 因為呢排湊呀女辛苦咗,好累呀！

作為龍女既我, 希望新一年可以... (實際d) 間屋可以裝修一下啦, 呀仔入到間好學校啦, 呀女易湊d啦,老公無咁忙, 少d壓力啦！

諗唐詩 - 登鸛鵲樓

呢首呢, 好似難dd, 不過呢排呢邊黃昏好靚, 我就話呢首詩講黃昏. (其實我都唔知係唔係！)

講親「更上一層樓」, 佢就鍾意爬上我身扮高處望落嚟！

其實每首詩有動作架, 不過佢拍video時又唔肯做！

諗唐詩 - 春曉

慧慧表ee話穎穎識得諗唐詩, 我叫呀仔諗番「床前明月光」, 佢竟然乜都唔記得哂！我諗一次俾佢聽佢都完全無印象！好, 就等我用d有趣方式, 等佢腦入面有幾首唐詩用下！

 

我有講個意境俾佢聽, 話春天d人唔願起身, 有雀仔叫, 之前一晚大風大雨, 跌哂d花落嚟！

佢都明d, 咁就易記d！

2012新年多節目 – 公園+bbq

我既一班香港媽媽朋友, 同埋佢地既小朋友, 成日都去唔同地方玩, 但阻於我駕車信心有限, 成日都跟唔到佢地去d遠地方玩, 我成日都覺得好可惜. 今次佢地話去silvewater玩, 都算唔太遠我, 再加埋我跟Mandy車尾去一次, 總算handle到！

好彩無錯過呢個機會, 呢個Blaxland Riverside Park好靚, 一方面多野俾小朋友玩, 而且近河邊環境亦好正！我地下午4-5點先到達, 嗰日又唔係好熱, 完全係最好既戶外活動既天氣！

 

不過我以為呀仔會好開心咁玩, 但好多佢都唔敢/ 唔鍾意玩, 成日好慢熱. 好似呢個爬網咁, 人地Brian, 小T細過佢1年2年都係咁玩, 呀仔就驚, 唔玩！

 

只係自己成日係呢d斜路度sir, 喂, 呢度唔係俾人sir架, 因住磿爛條褲！

 

我半推半就迫咗個仔玩呢個, 都幾刺激既, 但玩完佢就發脾氣, 刺激過籠！(我掛住睇, 無影到相！) 

又迫呀仔玩呢個大繩千秋, 但玩少少都唔肯繼續.

呀女呢？係呢度...Crystal好想有2nd baby, 一直苦無消息,唯有同呀女玩下希望俾到d luck佢！

 

唔知係咪我地少睇海呢, 呀仔成日坐係度睇海, 幾驚佢跌落去！

原本只打算嚟玩, 但mandy話佢就嚟番hk想清咗冰箱d肉佢, 不如係嗰度bbq埋, 我梗係舉腳贊成, 唔使諗dinner嘛！我就嗰朝早嗱嗱聲烚咗d蛋、紅蘿蔔同薯仔, 有時間雪凍整咗個沙津, 都幾好銷路！

我覺得sydney d 家庭活動設備好好, bbq地方企企理埋, 有得燒野食得嚟附近有水喉, 多廁所得嚟都算乾淨！(辛苦哂 Samuel & Mandy, 係咁幫我地燒！)

當然, 呢d咁既時候, 呀仔唔會食太多野, 仲成日想去玩. 但入黑天氣越來越凍, 我又要跟mandy車尾, 所以襯未太黑都要走.

 

好彩,臨尾都同班朋友仔玩埋一堆！(嗰日既小朋友, 夾埋我地有5個男仔, 得呀女1個女仔. 我地呢邊好似興生仔多d....)

慢熱既呀仔, 初初就唔玩, 臨走時先玩到唔願走！

過幾日有媽媽約我去一個普通公園玩, 呀仔唔肯去, 話要去番呢個「好好玩公園」！激死！

我既駕車板圖又闊多dd啦, 以後可以去silverwater呢個地方！(穎穎, 等你嚟呀！)

2012新年多節目 – 打保齡

我一直都想帶個仔打保齡, 終於有機會 - 1月1日全家人新年飲茶, 之後呀仔既表哥表姐提議去打保齡, 我梗係舉腳贊成！

同其他人一樣, 呀仔同我都各佔一個局, 我地都換咗正式打bowling既鞋！但我都知未必有俾小朋友玩既保齡, 唯有俾個最輕既波俾呀仔(都6磅), 但佢都要用個輔助slide, sir個波去lane！

結果, 呀仔竟然大勝各大人, 攞最高分！哈哈...梗係啦, 佢有嗰個輔助slide, 而又係我幫佢擺個slide, 再加上小朋友lane佢地有個「防入坑裝置」, 梗係易win啦！示範：

 妹妹呢.... 賴咗督大poo poo.... 大個d先到你玩啦！

(p.s. 呢日發生一段驚險小插曲：當各表哥姐嚟到我屋企, 再出發去打bowling時, 我竟然發雞盲,倒車時睇唔到lucas架車, 一野撞埋去！嚇到我死, 亦嚇到佢地全車人死！好彩佢地話無乜事, 但我都好炆自己：到今時今日架車依然咁唔小心！ :(  )

2012新年多節目 – 煙花迎新

呀仔鍾意睇煙花, 我諗咗好耐之後, 終於決定係屋企食完晚飯, 就一個人稱住兩隻小朋友, 出咗parramatta睇煙花 (諗咁耐, 因為問自己做乜要攞苦嚟辛; 而出門口係因為 - 個仔鍾意嘛！同埋新年俾d節目佢囉！).

我地睇9pm嗰場, 因為小朋友早瞓. 我成8:45pm先去到, 泊咗個遠少少既位, 行大概2-3個字先到. 都好, 唔使等咁耐！

為怕呀仔悶, 一早買定d螢光棒俾佢玩！

 

雖然只係parramatta, 但我覺得d煙花都唔差！同埋都幾近睇！(呢張相係由一個矮矮小朋友既角度睇煙花！)

 睇完煙花固然開心, 之後行番去泊車嗰度, 經過d「行人專用區」, 同呀仔解釋因為多人行所以block咗馬路俾人行呢個道理, 佢好開心覺得好新奇, 係度又跑又跳！

 

其實上年都有係呢度睇煙花, 嗰時大肚帶住個周圍走既o靚仔; 今年就「一稱二」. 其他人覺得我「一稱二」好似好難好辛苦, 但坦白講都唔係想像中咁難, 而且俾到個仔一個開心既新年回憶, 都好值得！

妹妹8個月大 - 2隻牙仔 + 周圍碌 + 食到d solid

原來妹妹今日8個月大啦！呢個age都幾得意幾好玩！

食 - 之前成日擔心佢食固體麻麻, 我最近發現原來佢鍾意食街買一包包現成既, for 4個月大食好smooth嗰d！我都照餵呢d, 佢有時食少少, 有時竟然食成包！長遠計, 我會煮番俾佢食, 但等佢可以慢慢食杰d先, 因為我整唔到人地咁smooth！(嘩, 一轉solid, d poo poo又杰又臭！)

 

不過最衰係佢宜家半夜要起身食奶！我又唔想佢吵醒全世界, 矇矇忪忪照餵佢等自己有覺好訓, 但其實係好唔啱. 我亦因為呢個原因, 一直唔敢戒人奶, 如果晚晚要沖奶粉, 咪煩死我？

牙 – 8個月大出咗2隻牙仔, 唔似哥哥成一歲先出咁遲！不過有時食人奶時大力咬我都幾痛！我即刻鬧佢！

 

訓 – 早排唔小心搞到佢餐餐「食住訓」, 怕佢半夜醒咗自己訓唔番, 所以用咗幾日迫佢自己訓, 方法係日頭如果都sure佢眼訓, 就放佢係床由佢喊, 係都要佢自己訓, 而唔係「食住訓」或者「抱住訓」. 初時佢真係夠膽死喊成個鐘！我都成日question自己：佢唔通唔眼訓？咁樣work唔work？好彩幾日之後就搞掂, 宜家放親佢落床一定大喊, 但幾分鐘後自己收聲訓著！希望繼續！夜覺我keep番食住訓, 至怕半夜佢喊, 又係餵住訓, 希望我慢慢戒埋呢樣嘢！

郁 – 由之前只識坐, 反一面身, 到宜家係塊地度碌來碌去！呢一兩個禮拜仲識得初步爬, slide向前攞玩具！(有時都有d驚險野, 幾牙煙架！)

有時我坐係廳, 呀仔睇電視, 個女就碌來碌去玩玩具, 覺得呢個畫面都幾幸福！:)

呢排呀女都算乖, 多數時間都肯自己玩, 喊多數係肚餓或者眼訓, 都handle到. 不過開始餵solid, 時間表都亂哂, 要重新執整過.